Potty training

تدريب الطفل على دخول الحمام 

مرحلة مهمة فى حياة كل أم بس لازم تتذكرى كذا حاجه قبل ما تبدأى ،

 أولا: الدعاء انك تدعى ربنا ييسرلك الأمر ده ويهديلك ابنك انه يقدر يستوعب التدريب كويس 

ثانيا: تتذكرى انه مش هيفضل كده طول العمر ، مفيش داعى  لاستعجال أو العصبيه أو الضغط على الطفل 

ثالثا:

تذكرى دايما انها مش مسابقة

it is not a competition

متبصيش لطفل تانى أبدا حتى لو كان أخوه كل طفل بيختلف عن التانى 

والأولاد بيتأخروا نسبيا عن البنات 

قدرة التحكم فى الإخراج بالنسبة للعمر ..علميا : 

منقول من مقالة نشرتها جامعة John Hopkins

أول عام فى عمر الطفل : لا يوجد تحكم على الإطلاق

من عام إلى عام ونصف : تحكم قليل جدا

من عام ونصف إلى عامين : يزداد التحكم بشكل نسبى مقارنة بالشهور السابقة ولكن حتى الآن لا يوجد تحكم بشكل كامل 

من عامين إلى عامين ونصف :يبدأ التحكم بشكل شبه كامل عند بعض الأطفال 

من عامين ونصف إلى ثلاثة أعوام: تحكم شبه كامل عند معظم الأطفال 

المتوسط : سن عامين و3 شهور هو أفضل سن للاستجابة لتدريب البوتى 

مع العلم انه قد تحدث حوادث للطفل بعد 3 سنوات وده شىء وارد جدا ولا يستدعى القلق

لا يطلق تشخيص التبول أو التبرز اللا إرادى على الطفل إلا بعد عامه السادس وهنا يستدعى التدخل الطبى 

من سن 3 سنوات إلى 5 سنوات تقبلى أى حوادث للطفل طالما أنها غير متكرره وتحدث  
بين الحين والآخر ربما لخوف الطفل اوقلقه من شىء ما  مثل ميلاد طفل آخر ، أو التنقل إلى مكان جديد أو أو ، كل دورك فقط معرفة السبب والتعامل معه  

امتى أعرف ان طفلى مستعد لبداية التدريب ؟ 

_ متحكم فى المشى جيدا

_بيحكيلك اما يحس انه عمل بيبى أو ستول  فى الحفاض

_بيتضايق اما يحس ان الحفاض مليان أو عاوز يتغير

_بيقدر يشيل الحفاض لوحده أو البنطلون يقدر يقلعه لوحده

_بيتتبعك وانتى داخله الحمام او بيتتع أخواته أو باباه 

_الحفاض بيفضل جاف فتره أكتر من ساعتين خلال اليوم 

الادوات المطلوبه للتدريب:

_البوتى المتنقله 

_البوتى اللى على شكل قاعده تويلت 

_دبدوب أو عروسه الطفل بيحبها تشاركه التدريب 

_مناديل لتعويد الطفل على استخدامها بعد كل استخدام للتويلت

_استيكرز لجذب الطفل ولصقها على التويلت أو البوتى كل ما الطفل يستجيب ليكى

_مشمع للمرتبه وأيضا بانتى خامة المشمع من الخارج

الطريقه :

الكلام كتير والمداراس مختلفه والطريقه المناسبة لطفلك ممكن متنفعش مع طفل غيرك وهكذا ..

* الطريقه الأولى : 

ودى مناسبه أكتر للأم العامله او المشغوله نسبيا 

ودى هتستبدلى الحفاض العادى بال

 training pants

اللى على شكل بانتبهات عاديه بس بخامة الحفاض

ويكون لابسها طول اليوم وتدخليه على بوتى التويلت أو البوتى المتنقله زى ما الطفل يحب 

وتقعديه لمدة عشر دقايق ، الكلام ده هتكرريه كل نصف ساعه مثلا او لو انتى مش معاه هتقوم بيها ال caregiver

أيا كانت والدتك أو فى الحضانه 

الطفل ممكن يستجيب وممكن لا مرة فى مرة قد تصيب ، 

الطريقه دى هتاخد معاكى على الاقل شهر وقد تمتد لشهور فلا تيأسى 

* الطريقة التانيه : 

ودى مناسبة أكتر للأم المتواجده مع طفلها طول الوقت ولا تعمل 

فى الحاله دى الطفل هيستغنى عن الحفاض طول اليوم /وهتسيبيه مكشوف طول الوقت مع إزاله سجاد المنزل وتغطية المفروشات 

اول ما تشعرى ان الطفل هيبدأ يعمل  تشيليه على التويلت أو البوتى المتنقله ايهما أقرب

طبعا مع أى نجاح للطفل لازم تظهرى تشجيعك ليه زى ما قلنا عن طريق الاستيكرز أو تصقفى أو تحكى لوالده وجدته عن النجاح اللى قام بيه 

مهم جدا تسلى الطفل وهو قاعد على البوتى بحيث يقدر يتخطى أى قلق او خوف قد يشعر بيه ، ممكن تحضرى له قصه بتحكى عن طفل وتجربته مع البوتى ، وممكن انتى تألفى له قصه لو مش متوفر عندك وتحكيهاله ، وممكن كمان لو قاعد على البوتى المتنقله تشغلى اليوتيوب على فيديو لطفل يقوم بالتدريب هيتبسط بيه جدا وهيقدر يفهم بسرعه الفكره وانه مش لوحده ،

دايما شاركى عرايس الطفل ولعبه معاه وقعديهم على البوتى سواء قبل أو بعد وصقفيلهم كأنهم نجحوا هما كمان 

لو الطفل أظهر خوف أو بكاء من البوتى ممكن تدربيه على استخدامها الأول وهو 
 لابس الحفاض بحيث يبدأ يتعود بس على الجلوس عليها ولو استمر الخوف والبكاء 
ده أيام متواصلة أجلى الموضوع أسبوع واعرضيها عليه تانى 
رأيى أنا الشخصى : تبدأى تعودى الطفل على قعدة البوتى من سن صغيره يعنى عام ونصف مثلا مش بغرض التخلى عن الحفاض لكن بغرض انه يتعود فقط على طريقة الجلوس والمعرفة بالشىء فى سن مبكرة أفضل لأن مشاعر الخوف وخيال الطفل انه ممكن يقع أو مثل ذلك مبيكونش موجود أوى فى سن مبكرة 

رد الفعل لو الطفل لم يوفق مهم جدا ، علشان كده قلنا اتخلصى من كل حاجه خايفه عليها زى السجاد وغيره علشان الموضوع بالنسبه لك يكون سهل نوعا ما ، تقبلى ده بروح حلوة حتى لو تعبانه من جواكى معلش اتحملى جدا واظهرى العكس تماما وخديه فى حضنك وخدى نفس عميق وذكرى نفسك دايما ان هو طفل نبته صغيره لسه بتتعلم فمتكونيش حمل عليه برد فعلك لانه ممكن يجيب نتيجه عكسية 

تذكرى دايما ان كل ده فى ميزان حسناتك يوم القيامة بإذن الله 

وحاولى تفرغى نفسك من أى التزامات تانيه قد تكون ضغط عليكى بحيث يكون هو شغلك الشاغل الفتره دى 

فترة الخروج والليل : 

أنا ضد تماما المدارس اللى بتقول طالما قلعتى الحفاض للطفل قلعيه مرة واحده  ساعه24 وشايفه ان ده أمر قاسى جدا على الطفل ومهمه كبيره قد تضره نفسيا ، وبفضل النظام التدريجى فى كل شىء مثل الفطام تماما ، تذكرى انك بتتعاملى مع طفل عمره عامين فقط بيتعلم حاجه جديده لأول مرة فى حياته ،بيغير أسلوب حياته تماما ، احنا رغم اننا كبار لو طلب مننا نغير أسلوب حياتنا فى حاجه معينة شوفوا بناخد وقت أد إيه ، الموضوع مش بييجى مرة واحده ، ومره بنغلط ومرة نرجع تانى وهكذا ،فرفقا رفقا بأطفالكم يا جماعه 

إزاله الحفاض فى الخروج والليل لا يتم إلا بعد التمكن التام خلال اليوم فى المنزل وينصح بقضاء أول فترة فى المنزل وتأجيل الخروج علشان ميكونش مشقه علينا وعليه، أيضا الخروج قد يؤخر التدريب نوعا ما ، أما بالنسبة لفترة النوم فلا يتم الإزاله إلا بعد شهرعلى الأقل من التمكن التام فى النهار

نقطة أخرى رافضاها فكرة انك طالما بدأتى مترجعيش تانى ، لا طبعا ارجعى تانى لو لقيتى عدم استجابة فترة طويله مش جايز يكون طفلك فعلا العمر اللى هيقدر يتحكم فيه مش ده ،وزى ما قلنا فوق هو معدل  من سن كذا لسن كذا مش سن معين 

فمتحمليش نفسك وتحملى طفلك فوق طاقته وخليكى ريلاكس تماما ، وهذكر تانى الطفل مش هيفضل كده طول العمر فهونا هونا

يفضل التدريب يكون قبل ما الطفل يروح الحضانه وتكونى انتى المسئوله عن ذلك مش الحضانة لان انتى مش هتكونى ضامنة المعامله أو رد الفعل يكون ازاى مهما كانت سمعة الحضانة كويسه لأن أى إنسان مهما كان كويس له قدرات وله طاقه ومفيش زى الأم اللى تقدر تتحمل طفلها وتصبر على ضيقها وتعبها وتضحك فى وش طفلها علشان تراعى نفسيته ، فمتسمحيش لحد يقوم بالموضوع ده غيرك حتى لو هتاخدى أجازه فترة من الشغل لو انتى بتشتغلى علشان مصلحة طفلك أولا

إزاله الحفاض فترة النوم :

هنذكر تانى يفضل لا تتم إلا بعد ما يتمكن كويس بالنهار ، ، خلال فترة التدريب بالنهار ممكن تلبسيه الحفاض اللى على شكل بانتى خلال النوم ويكون بعد ما يدخل فى النوم ودى فكرة برضه كويسه ، 

اول ما تبدأى تزيلى الحفاض خلال النوم يكون عندك مشمع بطول المرتبة تفرشيه ، تلبسى الطفل بانتى قطن وفوقه البانتى اللى خامته مشمع من بره فترة لحد ما تحسى انه فعلا بدأ يتمكن كويس من فترة الليل 

بلاش شرب سوائل كتير قبل النوم وتعويضها عند الاستيقاظ ، تظبطى المنبه كل تلات أو أربع ساعات يصحيكى تصحيه توديه على التويلت 10 دقائق وترجعوا تناموا تانى ، 

مع الوقت بإذن الله هيكون الموضوع سهل ويسير فلا تتعجلى 

متبدأيش للطفل التدريب إلا ما يكون مستقر تماما / 
يعنى مش تعبان
مش وقت فطامه 
  مش مسافر من مكان لآخر جديد عليه 
مش وقت دخول الحضانة



أتمنى لكل الأمهات رحلة موفقه ميسرة فى تدريب طفلها ،